Ciidamada Booliska Gaalkacyo oo toogasho ku dilay nin dad ku laayay Gaalkacyo caawa
Gaalkacyo :- Nin hubaysan ayaa galabta maqribkii, waxaa uu weerar ku qaaday culimo ku socotay masjid ku yaala Gaalkacyo kuwaas oo doonayay inay salaada maqribka tukadaan.
Ninkan oo ku hubaysanaa bastoolad ayaa waxaa uu dhaawacay labo wadaad, kadibna waxa uu u cararay dhanka koonfur bari, ciidamada Booliska iyo shacabkii salaada u socday ayaana cayrsaday, waxaana ninku uu dhaawac u gaystay nin kale intii uu cararka ku jiray.
Taliyaha Qaybta Booliska Gobalka Mudug G/sare Muuse Xasaasi oo shir jaraa'id ku qabtay cusbitaalka guud ayaana ka warbixiyay dhacdadan.
"Ninkan waxaa uu bastoolad dhabanacas ah ku weeraray labo wadaad oo meherad fadhiyay kadibna u kacay salaada maqrib inay masjid ku tukadaan, waxa uu u gaystay dhaawac wuuna cararay, waxaana cayrsaday shacabka anaguna waan u dhawayn meesha wadaadada lagu dhaawacay waxaana ku cayrsanay gaariga aan wato", taliyaha qaybta Booliska Muuse Xasaasi.
Taliyuhu waxa uu sheegay in ninku uu ahaa nin aad u tabobaran, kuna dagaalamay bastoolada uu watay, hayeeshee ay ciidamadu isku dayeen inay nolol ku qabtaan balse ay u suurtoobi wayday kadib tabobarka ninku qabay oo uu isku difaacayay iyo waqtiga oo habeen sii galayay iyo isagoo cararkii ku dhawaaday xaafada Koonfurta Gaalkacyo, waxaana markaasi kadib ay ciidamadu toogteen ninka isagoona markaasi ay ku qabteen dhaawac.
G/sare Xasaasi waxa uu sheegay in ninku uu dhintay intay jidka kusoo jireen ee ay Cusbitaalka u soo socdeen, sidoo kale Muuse Xasaasi waxa uu sheegay in Booliska uusan gaarsiin wax khasaare , balse shacabka ay ka dhaawacmeen saddex qof oo mid ka mid ah uu liito, qofkaasi oo ah qof uu dhaawacay intii cararka ku jiray.
Amaanka Cusbitaalka ayaa aad loo adkeeyey, waxaana sidoo kale joogay Gudoomiyaha Gobalka Axmed Cali Salaad iyo Duqa Degmada C/raxmaan Maxamud Xaaji Xasan, waxaana loo ogolaaday saxaafadu inay sawiro ka qaadato ninkii falka dhaawacaha ah ee weerarka ah gaystay maydkiisa.
Website: www.allgaracad.com
